ఏప్రిల్‌ 3 నుండి18వ తేది వరకు పదవ తరగతి పరీక్షలు..

-పరీక్షల నిర్వహణకు పకడ్బంది ఏర్పాట్లు..
-జిల్లాలో 154 కేంద్రాలలో 30,134 మంది హాజరుకానున్న విద్యార్థులు..
-జిల్లా కలెక్టర్‌ ఎస్‌ డిల్లీరావు

విజ‌య‌వాడ‌, నేటి పత్రిక ప్రజావార్త :
ఏప్రిల్‌ 3వ తేది నుండి జిల్లాలో నిర్వహించనున్న పదవ తరగతి పరీక్షలకు 154 కేంద్రాల ద్వారా 30,134 మంది విద్యార్థులు పరీక్షలకు హాజరు కానున్నారని పరీక్షల నిర్వహణకు పకడ్భంది ఏర్పాట్లు చేయడం జరిగిందని జిల్లా కలెక్టర్‌ ఎస్‌ డిల్లీరావు తెలిపారు.
ఏప్రిల్‌ 3వ తేది నుండి జిల్లాలో నిర్వహించనున్న పదవ తరగతి పరీక్షల నిర్వహణపై బుధవారం జిల్లా కలెక్టర్‌ డిల్లీరావు నగరంలోని ఆయన విడిది కార్యాలయంలో మీడియా ప్రతినిధులతో సమావేశం నిర్వహించారు. సమావేశంలో జిల్లా కలెక్టర్‌ మాట్లాడుతూ రాష్ట్ర వ్యాప్తంగా ఏప్రిల్‌ 3వ తేది నుండి 18వ తేది వరకు పదవ తరగతి పరీక్షలు నిర్వహించేందుకు ప్రభుత్వం షెడ్యూల్‌ ప్రకటించడం జరిగిందన్నారు. జిల్లాలో 154 పరీక్ష కేంద్రాలను ద్వారా 30,134 మంది విద్యార్థులు పరీక్షలకు హాజరు కానున్నారన్నారు. వీరిలో 15,530 మంది బాలురు,14,604 మంది బాలికలు ఉన్నారన్నారు. పరీక్షలకు హాజరయ్యే విద్యార్థులలో 27,329 మంది రెగ్యులర్‌ విద్యార్థులు, 2,805 మంది ప్రైవేటు విద్యార్థులు ఉన్నారన్నారు. పరీక్షలకు సంబంధించిన ప్రశ్నపత్రాలను భద్రపరిచేందుకు 35 పోలీస్‌ స్టేషన్‌లను స్టోరేజ్‌ కేంద్రాలగా గుర్తించామన్నారు. పరీక్షల నిర్వహణకు ఇద్దరు అదనపు డిపార్టిమెంట్‌ అధికారులను , ఐదు ఫ్లైయింగ్‌ స్కాడ్‌లను, సి కేటగిరి కేంద్రాలకు 14 మంది రూట్‌ ఆఫీసర్లను, అదనంగా మరో 12 మంది రూట్‌ ఆఫీసర్లను ఏ,బి కేంద్రాలకు నియమించామన్నారు. 12 మంది అసిస్టెంట్‌ రూట్‌ ఆఫీసర్లను, 1,354 ఇన్విజిలేటర్లను నియమించామన్నారు. పరీక్షల అనంతర 19వ తేది నుండి 26వ తేది వరకు స్పాట్‌ వాల్యేషన్‌ నిర్వహించేందుకు బిషప్‌ అజరయ్య పాఠశాలను గుర్తించామని జిల్లా కలెక్టర్‌ తెలిపారు. పరీక్షల కేంద్రాల సమీపంలో 144 సెక్షన్‌ అమలో ఉంటుందని, 100 మీటర్ల పరిధిలో జిరాక్స్‌ సెంటర్లను మూసివేసేలా చర్యలు తీసుకున్నామన్నారు. `పరీక్షా కేంద్రాల వద్ద అవసరమైన బందోబస్తుని ఏర్పాటు చేయడంతో పాటు స్పాట్‌ వాల్యేషన్‌ చేయనున్న బిషప్‌ అజరయ్య పాఠశాల వద్ద 24 గంటలు పోలీస్‌ ఆర్మ్‌డు గార్డ్స్‌తో పహారా నిర్వహిస్తారన్నారు. ప్రశ్నపత్రాలను పరీక్ష కేంద్రాలకు చేరవేసేందుకు 12 క్లోజుడ్‌ కంటైనర్‌ వాహనాలను సిద్దం చేశామన్నారు. పరీక్ష సమయాలలో నిరంతరం విద్యుత్‌ సరఫరా ఉండేలా చర్యలు తీసుకోవాలని, విద్యార్థులు చదువుకునేందుకు వీలుగా రాత్రి వేళలో విద్యుత్‌ సరఫరా చేసేలా విద్యుత్‌ అధికారులను ఆదేశించిన్నట్లు తెలిపారు. పరీక్షల కేంద్రాలకు విద్యార్థులు చేరుకునే విధంగా ఆయా సమయాలలో ఆదనపు బస్సులను ఏర్పాటు చేశామని, హాల్‌టిక్కెట్‌ కలిగిన విద్యార్థులకు ఉచిత ప్రయాణానికి అనుమతించడం జరుగుతుందని జిల్లా కలెక్టర్‌ తెలిపారు. అన్ని పరీక్ష కేంద్రా వద్ద ప్రధమ చికిత్స కేంద్రాలను ఏర్పాటు చేసి అవసరమైన మందులను అందుబాటులో ఉంచాలని వైద్య అధికారులను ఆదేశించమన్నారు. ఎట్టి పరిస్థితులలోను పరీక్ష కేంద్రాలలోనికి మొబైల్‌ ఫోన్‌లను, ఎలక్ట్రానిక్‌ వస్తువులను అనుమతించబోమని సమయానికి విద్యార్థులు పరీక్ష కేంద్రాలకు చేరుకోవాలని జిల్లా కలెక్టర్‌ డిల్లీరావు సూచించారు. మీడియా ప్రతినిధుల సమావేశంలో జిల్లా విద్యా శాఖ అధికారి సివి రేణుక ఉన్నారు.