ప్రగతిశీల శక్తులకు స్ఫూర్తి క్యూబా

-24వ అంతర్జాతీయ కమ్యూనిస్టు, కార్మిక పార్టీల సమావేశంలో సీపీఐ జాతీయ సమితి కార్యదర్శి కామ్రేడ్ కె.రామకృష్ణ

హవానా, నేటి పత్రిక ప్రజావార్త :

క్యూబా విప్లవం ప్రపంచంలోని కమ్యూనిస్టు, ప్రగతిశీల శక్తులకు నిరంతర స్ఫూర్తినిస్తోందని భారత కమ్యూనిస్టు పార్టీ (సీపీఐ) జాతీయ సమితి కార్యదర్శి కె.రామకృష్ణ అన్నారు. క్యూబాలో జరుగుతున్న 24వ అంతర్జాతీయ కమ్యూనిస్టు, కార్మిక పార్టీల సమావేశంలో ఆయన సీపీఐ తరఫున ప్రసంగించారు. క్యూబా కమ్యూనిస్టు పార్టీకి, క్యూబా ప్రజలకు, సమావేశానికి హాజరైన అన్ని కమ్యూనిస్టు, కార్మిక పార్టీల ప్రతినిధులకు ఆయన విప్లవ అభివాదాలు తెలిపారు. ఆరు దశాబ్దాలకు పైగా అమెరికా సామ్రాజ్యవాద ఒత్తిళ్లు, ఆంక్షలను ఎదుర్కొంటూ సోషలిజాన్ని, దేశ సార్వభౌమత్వాన్ని కాపాడుతున్న క్యూబా ప్రజల ధైర్యం, త్యాగాలను ఆయన అభినందించారు.
2026లో మహానేత ఫిడెల్ కాస్ట్రో శతజయంతిని జరుపుకోబోతున్న నేపథ్యంలో ఈ సమావేశానికి ప్రత్యేక చారిత్రక ప్రాధాన్యత ఉందని రామకృష్ణ పేర్కొన్నారు. ఫిడెల్ కాస్ట్రో కేవలం క్యూబాకు చెందిన నాయకుడు మాత్రమే కాదని, ప్రపంచంలోని అన్ని ప్రగతిశీల ప్రజలకు చెందిన గొప్ప అంతర్జాతీయవాది, మార్క్సిస్టు-లెనినిస్టు, సామ్రాజ్యవాద వ్యతిరేక విప్లవ నాయకుడని అన్నారు.
క్యూబా విప్లవం విద్య, వైద్యం, శాస్త్ర సాంకేతిక రంగం, బయోటెక్నాలజీ, సామాజిక న్యాయం వంటి రంగాల్లో సాధించిన విజయాలు ప్రపంచానికి ఆదర్శంగా నిలిచాయని తెలిపారు. ఆర్థిక దిగ్బంధనం వంటి తీవ్ర ప్రతికూల పరిస్థితుల్లో కూడా క్యూబా తన ప్రజలకు ఉచిత వైద్యం, సార్వత్రిక విద్య, సామాజిక భద్రతను అందించడం సోషలిజం శక్తిని నిరూపిస్తోందన్నారు.
ఆఫ్రికా, లాటిన్ అమెరికా, ఆసియా తదితర ప్రాంతాల్లో విముక్తి ఉద్యమాలకు క్యూబా అందించిన సహకారాన్ని ఆయన గుర్తుచేశారు. క్యూబా వైద్యులు, ఉపాధ్యాయులు ప్రపంచంలోని అనేక దేశాల్లో అందించిన సేవలు అంతర్జాతీయవాదానికి గొప్ప ఉదాహరణగా నిలిచాయని చెప్పారు.
ప్రపంచ శాంతికి సామ్రాజ్యవాదం ప్రధాన ముప్పు
ప్రస్తుతం ప్రపంచం తీవ్ర రాజకీయ, ఆర్థిక, సైనిక అస్థిరతను ఎదుర్కొంటోందని రామకృష్ణ అన్నారు. అమెరికా, దాని మిత్రదేశాల ఆధిపత్య రాజకీయాలు, సైనిక జోక్యాలు, ఏకపక్ష ఆంక్షలు, వాణిజ్య యుద్ధాలు, ఆయుధీకరణ ప్రపంచ శాంతికి ముప్పుగా మారాయని విమర్శించారు. నాటో విస్తరణ, సైనిక కూటముల బలోపేతం, ఆయుధ పోటీ వల్ల మానవాభివృద్ధికి వినియోగించాల్సిన భారీ వనరులు యుద్ధ సన్నాహాలకు మళ్లుతున్నాయని అన్నారు.
పాలస్తీనా, ముఖ్యంగా గాజాలో కొనసాగుతున్న మానవతా విషాదంపై ఆయన తీవ్ర ఆందోళన వ్యక్తం చేశారు. పాలస్తీనా ప్రజల న్యాయబద్ధమైన జాతీయ హక్కులకు సీపీఐ సంపూర్ణ మద్దతు ప్రకటిస్తోందని, తూర్పు జెరూసలెంను రాజధానిగా చేసుకుని స్వతంత్ర పాలస్తీనా దేశం ఏర్పడాలని డిమాండ్ చేశారు.
పశ్చిమాసియాలో ఇరాన్‌పై జరుగుతున్న సైనిక దాడులు, ప్రాంతీయ ఉద్రిక్తతలు మరింత విస్తృత యుద్ధానికి దారితీయవచ్చని ఆయన హెచ్చరించారు. దేశాల మధ్య సమస్యలను సైనిక బలంతో కాకుండా చర్చలు, దౌత్యం, పరస్పర గౌరవం, సార్వభౌమత్వానికి విలువనిస్తూ పరిష్కరించుకోవాలని పిలుపునిచ్చారు.
భారత్‌లో మతతత్వం, నయా ఉదారవాద విధానాలకు వ్యతిరేకంగా పోరాటం
భారతదేశంలో సీపీఐ నయా ఉదారవాద ఆర్థిక విధానాలు, ప్రైవేటీకరణ, నిరుద్యోగం, కార్మికులు, రైతుల హక్కులపై దాడులకు వ్యతిరేకంగా పోరాడుతోందని రామకృష్ణ తెలిపారు. అదే సమయంలో భారత రాజ్యాంగంలోని లౌకిక, ప్రజాస్వామ్య విలువలను, సామాజిక న్యాయాన్ని పరిరక్షించేందుకు కట్టుబడి ఉందన్నారు.
ప్రపంచవ్యాప్తంగా కార్మికులు, రైతులు, యువత, మహిళలు, ఆదివాసీలు, ప్రజాస్వామిక శక్తులు ఎదుర్కొంటున్న సమస్యలపై కమ్యూనిస్టు, కార్మిక పార్టీలు మరింత సమన్వయంతో పనిచేయాల్సిన అవసరం ఉందని అన్నారు. అంతర్జాతీయ కమ్యూనిస్టు ఉద్యమం కేవలం ప్రకటనలకే పరిమితం కాకుండా ఉమ్మడి కార్యాచరణ, సంఘీభావ కార్యక్రమాలు, యువజన సహకారం, భావజాల పరస్పర మార్పిడి వంటి కార్యక్రమాలను మరింత విస్తృతం చేయాలని సూచించారు.
క్యూబాపై అమెరికా ఆంక్షలు ఎత్తివేయాలి
సోషలిస్టు క్యూబాపై అమెరికా విధించిన అక్రమ ఆర్థిక, వాణిజ్య, ఆర్థిక దిగ్బంధనాన్ని తక్షణమే, ఎలాంటి షరతులు లేకుండా ఎత్తివేయాలని సీపీఐ తరఫున రామకృష్ణ డిమాండ్ చేశారు. అలాగే క్యూబాను అమెరికా రూపొందించిన “టెర్రరిజానికి మద్దతు ఇచ్చే దేశాల” జాబితా నుంచి వెంటనే తొలగించాలని డిమాండ్ చేశారు.
ప్రపంచంలోని కమ్యూనిస్టు, కార్మిక పార్టీలు క్యూబాకు మరింత బలమైన అంతర్జాతీయ సంఘీభావాన్ని అందించాలని ఆయన పిలుపునిచ్చారు. పాలస్తీనా ప్రజల న్యాయబద్ధమైన పోరాటానికి, దురాక్రమణను ఎదుర్కొంటున్న అన్ని దేశాల సార్వభౌమత్వానికి మద్దతుగా అంతర్జాతీయ సంఘీభావాన్ని బలోపేతం చేయాలని అన్నారు.
ఫిడెల్ కాస్ట్రో శతజయంతి సందర్భంగా ఆయన ఆశయాలను మరింత ముందుకు తీసుకెళ్లాలని, అంతర్జాతీయ కమ్యూనిస్టు ఉద్యమ ఐక్యతను బలోపేతం చేయాలని రామకృష్ణ పిలుపునిచ్చారు. సామ్రాజ్యవాదం, పెట్టుబడిదారీ వ్యవస్థ, వలసవాదం, ఫాసిజం, అన్ని రకాల అణచివేతలకు వ్యతిరేకంగా ప్రపంచవ్యాప్త పోరాటాన్ని ఉధృతం చేయాలని అన్నారు.
“క్యూబా విప్లవం వర్ధిల్లాలి, శ్రామిక అంతర్జాతీయవాదం వర్ధిల్లాలి, కమ్యూనిస్టు-కార్మిక పార్టీల ఐక్యత వర్ధిల్లాలి” అని నినదిస్తూ ఆయన తన ప్రసంగాన్ని ముగించారు.