గౌరవరం గ్రామంలో కేడీసీసీ బ్యాంకు సహకారంతో సోలార్ ప్యానెల్స్ ప్రారంభం

జగ్గయ్యపేట, నేటి పత్రిక ప్రజావార్త :
జగ్గయ్యపేట మండలం గౌరవరం గ్రామంలో కేంద్ర ప్రభుత్వ ప్రతిష్టాత్మక పథకం “ప్రధానమంత్రి సూర్య ఘర్ యోజన” కింద గృహాలపై సోలార్ ప్యానెల్స్ ఏర్పాటు కార్యక్రమం ఘనంగా నిర్వహించబడింది. కృష్ణా జిల్లా కేంద్ర సహకార బ్యాంకు (KDCC Bank) ఆర్థిక సహకారంతో ఈ పథకాన్ని అమలు చేస్తూ, గ్రామీణ ప్రజలకు తక్కువ ఖర్చుతో నిరంతర విద్యుత్ సదుపాయం కల్పించడమే లక్ష్యంగా ముందుకు తీసుకువచ్చారు.

ఈ కార్యక్రమానికి ముఖ్య అతిథులుగా మాజీ మంత్రి, ఎన్టీఆర్ జిల్లా తెలుగు దేశం పార్టీ అధ్యక్షులు, కేడీసీసీ బ్యాంక్ చైర్మన్ నెట్టెం రఘురామ్ మరియు జగ్గయ్యపేట శాసనసభ్యులు శ్రీరాం రాజగోపాల్ (తాతయ్య) విచ్చేసి, రిబ్బన్ కటింగ్ చేసి సోలార్ ప్యానెల్స్‌ను అధికారికంగా ప్రారంభించారు.

ఈ సందర్భంగా నెట్టెం రఘురామ్ మాట్లాడుతూ, ముఖ్యమంత్రి నారా చంద్రబాబు నాయుడు మరియు ఆంధ్రప్రదేశ్ ప్రభుత్వం ఈ పథకానికి అత్యంత ప్రాముఖ్యత ఇస్తున్నాయని తెలిపారు. గ్రామీణ ప్రాంతాల్లో సౌర శక్తి విస్తరణ ద్వారా రైతులు, పేదలు మరియు మధ్యతరగతి కుటుంబాలకు భారీగా లాభం చేకూరుతుందని పేర్కొన్నారు. విద్యుత్ బిల్లుల భారం తగ్గడంతో పాటు పర్యావరణ పరిరక్షణకు కూడా ఇది దోహదపడుతుందని వెల్లడించారు. ప్రతి గ్రామంలో ఇలాంటి హరిత శక్తి ప్రాజెక్టులను అమలు చేయడమే తమ లక్ష్యమని స్పష్టం చేశారు.

జగ్గయ్యపేట ఎమ్మెల్యే శ్రీరాం రాజగోపాల్ (తాతయ్య) మాట్లాడుతూ, కేడీసీసీ బ్యాంక్ చైర్మన్‌గా నెట్టెం  రఘురామ్ సహకార బ్యాంకింగ్ వ్యవస్థను ప్రజలకు మరింత చేరువ చేస్తూ, ప్రభుత్వ సంక్షేమ పథకాలను నేరుగా లబ్ధిదారుల గడపకు చేర్చడంలో కీలక పాత్ర పోషిస్తున్నారని కొనియాడారు. ముఖ్యంగా సౌర విద్యుత్ రంగంలో గ్రామీణ గృహాలకు మద్దతుగా KDCC బ్యాంక్ ద్వారా నిధులు సమకూర్చడం అభినందనీయమని ప్రశంసించారు.

గౌరవరం సొసైటీ అధ్యక్షులు కట్ట వెంకట నరసింహారావు మాట్లాడుతూ, సహకార బ్యాంక్ ఆధ్వర్యంలో చేపడుతున్న ఈ చర్యల వల్ల గౌరవరం గ్రామం అభివృద్ధి దిశగా మరింత ముందుకు సాగుతుందని తెలిపారు.

గౌరవరం గ్రామానికి చెందిన కరణం శ్రీనివాసరావు, కట్ట గోపీ ల నివాసాలపై ట్రూజోన్ సోలార్ / సన్‌టెక్ ప్రైవేట్ లిమిటెడ్ సంస్థల ద్వారా, KBC ఎంటర్‌ప్రైజెస్ ప్రొప్రైటర్ కట్టా బుచ్చిబాబు ఆధ్వర్యంలో నాణ్యమైన ప్రమాణాలతో సోలార్ ప్యానెల్స్‌ను విజయవంతంగా అమర్చారు.

ఈ కార్యక్రమంలో KDCC బ్యాంక్ సహకారంతో గౌరవరం గ్రామ సొసైటీ తరఫున:
రైతు నేస్తం కింద ఇద్దరు రైతులకు,
కౌలు రైతుల కింద మరో ఇద్దరికి,
3 SAG డ్వాక్రా సంఘాలకు
మొత్తం రూ.68 లక్షల రుణాన్ని లబ్ధిదారులకు అందజేశారు.

ఈ కార్యక్రమంలో గౌరవరం సొసైటీ చైర్మన్, జగ్గయ్యపేట మండల పార్టీ అధ్యక్షుడు కట్టా వెంకట నరసింహారావు, పోచంపల్లి సొసైటీ చైర్మన్ ముల్లంగి రామకృష్ణారెడ్డి, గ్రామ సర్పంచ్ ముత్తవరపు పావని వెంకటేష్, కేడీసీసీ బ్యాంక్ జనరల్ మేనేజర్ నన్నపనేని రంగబాబు, సాధినీడి శేషగిరి, బండిపాలెం గ్రామ సొసైటీ చైర్మన్ బొల్లినీడి అప్పారావు, మల్కాపురం సొసైటీ చైర్మన్ ఘనపనేని పిచ్చయ్య, జగ్గయ్యపేట KDCC బ్యాంక్ మేనేజర్ రమేష్ తో పాటు పలువురు నాయకులు, కార్యకర్తలు, అధికారులు మరియు గ్రామ ప్రజలు పెద్ద సంఖ్యలో పాల్గొన్నారు.

ఈ కార్యక్రమం గౌరవరం గ్రామాన్ని హరిత శక్తి దిశగా ముందుకు నడిపించే కీలక అడుగుగా నిలిచిందని పాల్గొన్నవారు అభిప్రాయం వ్యక్తం చేశారు.