ఘనంగా ఆర్ఎంసి కార్నివాల్ ముగింపు వేడుకలు

రాజమహేంద్రవరం, నేటి పత్రిక ప్రజావార్త :
నగరంలోని సుబ్రహ్మణ్య మైదానం నందు నిర్వహించిన ఆర్ఎంసి (RMC) కార్నివాల్ వేడుకలు ఆదివారం అత్యంత ఘనంగా ముగిశాయని మున్సిపల్ కమిషనర్ రాహుల్ మీనా తెలిపారు.

రెండు రోజులపాటు కొనసాగిన ఈ కార్నివాల్‌కు నగర ప్రజల నుంచి విశేష స్పందన లభించిందని ఆయన పేర్కొన్నారు.
ఆదివారం సెలవు దినం కావడంతో పెద్ద సంఖ్యలో ప్రజలు కుటుంబ సమేతంగా కార్నివాల్‌కు విచ్చేసి ఆహ్లాదకరమైన వాతావరణంలో వేడుకలను ఆస్వాదించారు. చిన్నారుల కోసం ఏర్పాటు చేసిన గేమ్స్, వివిధ రకాల ఫుడ్ స్టాల్స్, ఆకర్షణీయమైన సెల్ఫీ స్పాట్స్ ప్రజలను ప్రత్యేకంగా ఆకట్టుకున్నాయని కమిషనర్ తెలిపారు.

నగరవాసులకు వినోదంతో పాటు సామాజిక అనుసంధానం కల్పించాలనే ఉద్దేశంతో ఈ కార్నివాల్‌ను నిర్వహించామని, ప్రజల ఉత్సాహభరితమైన పాల్గొనడం కార్యక్రమ విజయానికి నిదర్శనమని రాహుల్ మీనా పేర్కొన్నారు. భవిష్యత్తులోనూ నగర ప్రజలకు ఇలాంటి సాంస్కృతిక, వినోద కార్యక్రమాలను మరింత విస్తృతంగా నిర్వహించేందుకు మున్సిపల్ కార్పొరేషన్ కృషి చేస్తుందని ఆయన తెలిపారు.