అటల్ టింకరింగ్ ల్యాబ్స్ వినియోగంలో ఏపీ ముందంజ

-ప్రశంసించిన యూనిసెఫ్, టీసీఎస్ బృందాలు
-యువ ఆవిష్కర్తలను తయారు చేయాలి: పాఠశాల విద్య కమిషనర్ ఎస్.సురేష్ కుమార్ 

విజయవాడ, నేటి పత్రిక ప్రజావార్త :
అటల్ టింకరింగ్ ల్యాబ్స్ సద్వినియోగపరచుకోవడంలో దేశం మొత్తంలో ఇతర రాష్ట్రాలతో పోలిస్తే ఆంధ్రప్రదేశ్ ముందంజలో ఉందని యూనిసెఫ్, టీసీఎస్ ప్రతినిధులు ప్రశంసించారు. శుక్రవారం న్యూఢిల్లీ నుంచి యూనిసెఫ్ ప్రతినిధులు అరేలియా ఆర్డిటో (చీఫ్ ఆఫ్ ఎడ్యుకేషన్), ప్రమీల (విద్యా నిపుణురాలు), హైదరాబాదు నుంచి యూనిసెఫ్ ప్రతినిధులు శేషగిరి మధుసూదన్ (విద్యా నిపుణులు), శిఖా రాణా (విద్యాధికారి), టీసీఎస్ నుంచి విమల్, విపుల్, శ్రీనివాస్ విశ్వనాథ, ఏపీ యునిసెఫ్ కన్సల్టెంట్ టి.సుదర్శన్, రాష్ట్ర నోడల్ అధికారి డా.జిఆర్ భాగ్యశ్రీ తదితరులు శుక్రవారం ఎన్టీఆర్ జిల్లాలో మొవ్వ, పెనమలూరు జిల్లా పరిషత్ ఉన్నత పాఠశాలలు సందర్శించారు. ఈ సందర్శనలో భాగంగా పాఠశాలల్లో ఏర్పాటు చేసిన అటల్ టింకరింగ్ ల్యాబ్ లను, హబ్ మరియు స్పోక్స్ మోడల్‌తో పాటు ప్రభుత్వం అమలు చేసిన STEM ఆధారిత కార్యక్రమాలను పరిశీలించారు. రాష్ట్రంలో అటల్ టింకరింగ్ ల్యాబ్ సక్రమంగా అమలయ్యేందుకు పాఠశాల విద్యాశాఖ కమిషనర్ ఎస్.సురేష్ కుమార్, సమగ్ర శిక్షా ఎస్పీడీ బి.శ్రీనివాసరావు, ఎస్సీఈఆర్టీ డైరెక్టర్ డా. బి. ప్రతాప్ రెడ్డి ఇతర అధికారుల క్రియాశీలకంగా చేపట్టిన బాధ్యతలను యూనిసెఫ్, టీసీఎస్ ప్రతినిధులు కొనియాడారు.

యువ ఆవిష్కర్తలను తయారు చేయాలి : పాఠశాల విద్య కమిషనర్ ఎస్.సురేష్ కుమార్ 
రాష్ట్రంలో విద్యా కార్యక్రమాలను బలోపేతం చేయడానికి యునిసెఫ్, టాటా కన్సల్టెన్సీ సర్వీసెస్‌కు చెందిన బృందాలు తొలి రోజు (గురువారం) పాఠశాల విద్యాశాఖ కమిషనర్ ఎస్.సురేష్ కుమార్ ని కలిసి , 21వ శతాబ్దపు నైపుణ్యాలు, STEM ఆధారిత విద్యను రాష్ట్రంలో ఎలా బలోపేతం చేయవచ్చో చర్చించారు. రాష్ట్రంలో అటల్ టింకరింగ్ ల్యాబ్స్ పనితీరుపై డాక్యూమెంటరీ రూపొందిస్తున్నామని యూనిసెఫ్ ప్రతినిధులు పాఠశాల విద్యాశాఖ కమిషనర్ ఎస్.సురేష్ కుమార్ తో అభిప్రాయాలు పంచుకున్నారు. మన విద్యా సంస్థల్లో జరుగుతున్న వినూత్న పద్ధతులను ప్రదర్శించడమే కాకుండా ఇతరులను కూడా అనుసరించేలా ప్రేరేపించేలా డాక్యూమెంటరీ తీస్తున్నందుకు పాఠశాల విద్యాశాఖ కమిషనర్  ఎస్.సురేష్ కుమార్ సంతోషం వ్యక్తం చేశారు. STEM ఆధారిత విద్య ద్వారా యువ ఆవిష్కర్తల ద్వారా సమస్యలకు పరిష్కారాలు సృష్టించడమే కాకుండా, ఆంధ్రప్రదేశ్ విద్యా స్వరూపాన్ని మార్చడానికి, ప్రతి విద్యార్థి తమ పూర్తి సామర్థ్యాలను గ్రహించే అవకాశం ఉందని పేర్కొన్నారు.
ప్రతినిధులతో కమిషనర్ ఎస్.సురేష్ కుమార్ మాట్లాడుతూ.. ఏపీలో అటల్ టింకరింగ్ ల్యాబ్ కార్యక్రమాలు చక్కగా జరుగుతున్నాయని, రాష్ట్ర వ్యాప్తంగా 713 ATLలు హబ్, స్పోక్ మోడల్‌గా రూపొందించామని తెలిపారు. 31 హబ్ పాఠశాలల్లో మొత్తం 185 పాఠశాలల్లో 5 స్పోక్స్ ఉన్నాయని తెలిపారు. ల్యాబ్ పనితీరును ధృవీకరించడానికి 713 పాఠశాలలను సందర్శించడానికి టాస్క్‌ఫోర్స్ బృందాన్ని కూడా పంపినట్లు తెలిపారు. పిల్లలను ప్రోత్సహించడానికి ‘సంకల్పం’ ప్రాజెక్ట్ పాఠశాలల్లో కూడా పనిచేస్తుందన్నారు. ATL మారథాన్, సీడ్ ది ఫ్యూచర్, సైన్స్ ఫెయిర్, ఇన్‌స్పైర్ తదితర సైన్స్ పోటీల్లో విద్యార్థులు ప్రతిభ చూపారని తెలిపారు. ఈ బృందాలు శనివారం కూడా తమ పర్యటనను కొనసాగిస్తాయని, పాఠశాల విద్యాశాఖ కమిషనర్ ఎస్.సురేష్ కుమార్ అన్నారు.