Prajavartha Online Telugu News
గుంటూరు, నేటి పత్రిక ప్రజావార్త :
గుంటూరు నగరపాలక సంస్థ పరిధిలోని మీడియా డివైజ్ డిస్ప్లే బోర్డ్స్ నిర్వహకులు ఈ నెల 15లోపు డిస్ప్లే ఫీజు బకాయిలు మొత్తం చెల్లించాలని, చెల్లించని వారి బోర్డ్ లను 16వ తేదీ నుండి తొలగిస్తామని నగర కమిషనర్ పులి శ్రీనివాసులు ఐఏఎస్ బుధవారం ఒక ప్రకటనలో స్పష్టం చేశారు. ఈ సందర్భంగా కమిషనర్ మాట్లాడుతూ గత ఫిబ్రవరి 24న బోర్డ్స్ ఏజన్సీల నిర్వహకులతో ప్రత్యేకంగా సమావేశం ఏర్పాటు చేసి, ప్రస్తుత ఏడాది, గతంలోని బకాయిలు మొత్తం మార్చి 15లోపు చెల్లించాలని తెలిపామని, వారు కూడా చెల్లిస్తామని హామీ ఇచ్చారన్నారు. కాని ఎక్కువ మంది ఫీజులు చెల్లించలేదని, అటువంటి వారి బోర్డ్ లను 16వ తేదీ నుండి పూర్తిగా తొలగిస్తామని స్పష్టం చేశారు. వార్డ్ సచివాలయాల వారీగా ఫీజులు చెల్లించిన, చెల్లించని వారి వివరాలతో 15వ తేదీ సాయంత్రానికి సమగ్ర నివేదిక ఇవ్వాలని పట్టణ ప్రణాళిక అధికారులను ఆదేశించామన్నారు. కనుక బకాయిలు 15వ తేదీలోపు చెల్లించాలని కోరారు.
