భాషా ప్రయుక్త రాష్ట్రాల ఏర్పాటుకు ఆద్యులైన అమరజీవి పొట్టి శ్రీరాములు చిరస్మరణీయులు

మచిలీపట్నం, నేటి పత్రిక ప్రజావార్త :
భాషా ప్రయుక్త రాష్ట్రాల ఏర్పాటుకు ఆద్యులైన అమరజీవి పొట్టి శ్రీరాములు చిరస్మరణీయులని జిల్లా కలెక్టర్ డీకే బాలాజీ పేర్కొన్నారు. ఆదివారం ఉదయం నగరంలోని కలెక్టరేట్ మీకోసం సమావేశం మందిరంలో అమరజీవి పొట్టి శ్రీరాములు జయంతి వేడుకలు ఘనంగా జరిగాయి. జిల్లా కలెక్టర్, పొట్టి శ్రీరాములు చిత్రపటానికి పూలమాల వేసి ఘనంగా నివాళులు అర్పించారు. ఈ సందర్భంగా జిల్లా కలెక్టర్ మాట్లాడుతూ పొట్టి శ్రీరాములు తెలుగు భాషకు ఒక ప్రత్యేక రాష్ట్రాన్ని సాధించిన మహనీయులన్నారు. కేంద్ర ప్రభుత్వం వద్ద తెలుగు భాషకు ఒక ప్రత్యేక రాష్ట్రం కావాలని చర్చకు వచ్చినప్పటికీ నిర్ణయం తీసుకోలేదన్నారు. భాషలకు ఒక ప్రత్యేక రాష్ట్రం ఉండాలనే ఆలోచన అందరికీ వచ్చిందన్నారు. అయితే మహనీయులు పొట్టి శ్రీరాములు దాన్ని ఆచరణలో పెట్టారన్నారు. పొట్టి శ్రీరాములు 58 రోజులు నిరాహార దీక్ష చేసి తెలుగు రాష్ట్రం ఏర్పాటు కోసం తుది శ్వాస విడిచారన్నారు. ఆయన చనిపోయాక చాలా భాషా రాష్ట్రాలకు డిమాండ్ వచ్చిందన్నారు. కేంద్ర ప్రభుత్వం స్పందించి దేశంలోనే మొట్టమొదటిసారిగా భాషా ప్రయుక్త రాష్ట్రంగా తెలుగువారి కోసం ఆంధ్ర రాష్ట్రం ఏర్పాటు చేసిందన్నారు. ఆ విధంగా దేశంలోని వివిధ భాషలకు ప్రత్యేక రాష్ట్రాలు రావడానికి శ్రీరాములు కారకులయ్యారన్నారు. ఈ కార్యక్రమంలో కలెక్టరేట్ ఏవో ఆంజనేయ ప్రసాద్ కలెక్టరేట్ సిబ్బంది పాల్గొన్నారు.