ఇంటర్నేషనల్ రివర్స్ బయ్యర్ సెల్లర్ మీట్ (ఆర్బీఎస్‌ఎమ్) విజయవంతం

విజయవాడ,  నేటి పత్రిక ప్రజావార్త :
ఆంధ్రప్రదేశ్ ఎంఎస్‌ఎంఈ డెవలప్మెంట్ కార్పొరేషన్ (ఏపీ ఎంఎస్‌ఎంఈ డీసీ) మరియు ఇండియన్ ఎక్స్‌పోర్ట్ ఆర్గనైజేషన్ ఫెడరేషన్ (ఎఫ్‌ఐఈఓ) సంయుక్తంగా విజయవాడలో ఏప్రిల్ 24 మరియు 25 తేదీల్లో నిర్వహించిన ఇంటర్నేషనల్ రివర్స్ బయ్యర్ సెల్లర్ మీట్ విజయవంతంగా ముగిసింది. ఈ కార్యక్రమం ద్వారా ఆంధ్రప్రదేశ్‌కు చెందిన మైక్రో, స్మాల్ & మీడియం ఎంటర్‌ప్రైజెస్ (ఎంఎస్‌ఎంఈలు)కు విదేశీ కొనుగోలు దారులతో నేరుగా కలవడానికి అవకాశం కల్పించబడింది. మొత్తం 51 అవగాహన ఒప్పందాలు మరియు వ్యాపార ఒప్పందాలు కుదిరాయి, వీటిలో చాలామంది తొలి ప్రయత్నంలో ఉన్న పారిశ్రామికులు మరియు మహిళా పారిశ్రామికులే. ఈ ఆర్బీఎస్‌ఎమ్ ద్వారా స్థానిక సంస్థలు తమ ఉత్పత్తుల ఎగుమతికి కొత్త మార్గాలు తెరచుకున్నాయి మరియు ప్రపంచ వ్యాప్తంగా వ్యాపార భాగస్వామ్యాలను ప్రోత్సహించింది.
వీడియో సదస్సులో పాల్గొన్న జాయింట్ డైరెక్టర్ జనరల్ ఉన్నికృష్ణన్ మాట్లాడుతూ, “ఆంధ్రప్రదేశ్ ప్రభుత్వం అందిస్తున్న మార్కెటింగ్ మద్దతుతో పాటు రాష్ట్రంలో ఉన్న విధాన సహకారం, పోర్ట్ ఆధారిత మౌలిక సదుపాయాలు రాష్ట్రాన్ని వేగంగా అభివృద్ధి చెందుతున్న రాష్ట్రంగా నిలిపే అవకాశం కలదు” అన్నారు.
ఈ కార్యక్రమంలో ఆంధ్రప్రదేశ్‌లోని 300కు పైగా ఎంఎస్‌ఎంఈలు తమ ఉత్పత్తులను అగ్రో & ఫుడ్ ప్రాసెసింగ్, టెక్స్‌టైల్స్ & గార్మెంట్స్, ఇంజనీరింగ్ గూడ్స్, హ్యాండీక్రాఫ్ట్ తదితర విభాగాల్లో ప్రదర్శించాయి. అమెరికా, జపాన్, యూకే, జీసీసీ దేశాలు, ఆఫ్రికా మరియు దక్షిణ ఆసియా దేశాల నుంచి వచ్చిన 25 మంది అంతర్జాతీయ కొనుగోలు దారులు పాల్గొన్నారు.
సమాప్తి సమావేశంలో మాట్లాడుతూ ఏపీ ఎంఎస్‌ఎంఈ డీసీ ఛైర్మన్ తమ్మిరెడ్డి శివశంకరరావు పేర్కొనగా, “ఈ ఆర్బీఎస్‌ఎమ్ విజయం మన ఎంఎస్‌ఎంఈలు అంతర్జాతీయ మార్కెట్ వైపు దూసుకెళ్లాలనే సంకల్పానికి నిదర్శనం. శిక్షణ, సామర్థ్య అభివృద్ధి, ట్రేడ్ ఫెసిలిటేషన్ వంటి అంశాలలో ప్రభుత్వ మద్దతు ఎప్పటికీ కొనసాగుతుంది.”
రాష్ట్ర ప్రభుత్వం ఎంఎస్‌ఎంఈలకు మద్దతుగా MSME-1 పోర్టల్ ప్రారంభించనుంది. ఈ పోర్టల్ ద్వారా ఎంఎస్‌ఎంఈలకు సంబంధించి అన్ని కమ్యూనికేషన్‌లు, సమస్యలు పరిష్కరించబడతాయి. అలాగే ఒప్పందాలపై ట్రాకింగ్ కోసం ప్రత్యేకంగా మరో పోర్టల్‌ను ప్రారంభించనున్నట్టు కూడా ఆయన వెల్లడించారు.