సంచార జాతులకు సామాజిక న్యాయం అందించాలి

-వారి హక్కుల పరిరక్షణకు ప్రత్యేక విధానం అవసరం
-ప్రధాని మోదీ ప్రభుత్వం ప్రత్యేక దృష్టి సారించింది: రాజ్యసభ సభ్యుడు పాకా వెంకట సత్యనారాయణ

విజయవాడ, నేటి పత్రిక ప్రజావార్త :
సంచార, అర్ధ సంచార, విముక్త జాతులకు రాజ్యాంగ ఫలాలు పూర్తిస్థాయిలో అందేలా ప్రత్యేక విధానం రూపొందించి సామాజిక న్యాయం చేయాల్సిన అవసరం ఉందని రాజ్యసభ సభ్యుడు పాకా వెంకట సత్యనారాయణ అన్నారు. స్వాతంత్ర్యం వచ్చి 80 సంవత్సరాలు పూర్తవుతున్నా సమాజంలోని అనేక వర్గాలకు స్వాతంత్ర్య ఫలాలు పూర్తిస్థాయిలో అందలేదని, ముఖ్యంగా సంచార, అర్ధ సంచార, విముక్త జాతులు అనేక సమస్యలను ఎదుర్కొంటున్నాయని తెలిపారు.

విజయవాడలోని భారతీయ జనతా పార్టీ రాష్ట్ర కార్యాలయంలో సంచార, అర్ధ సంచార, విముక్త జాతుల దినోత్సవం సందర్భంగా నిర్వహించిన కార్యక్రమంలో ఆయన మాట్లాడారు. ఎస్సీ, ఎస్టీ, బీసీ, మైనారిటీ వర్గాలకు వివిధ సంక్షేమ పథకాల ద్వారా ప్రయోజనాలు అందుతున్నప్పటికీ.. సంచార, అర్ధ సంచార, విముక్త జాతులపై సమగ్ర మదింపు, స్పష్టమైన వర్గీకరణ లేకపోవడం వల్ల అనేక తరాలు నష్టపోయాయని అన్నారు.

‘పుట్టుకతోనే నేరస్తులు’గా ముద్రవేశారు

భారతీయ సంస్కృతి, సంప్రదాయాల పరిరక్షణలో సంచార జాతుల పాత్ర ఎంతో కీలకమని పాకా వెంకట సత్యనారాయణ పేర్కొన్నారు. విదేశీ దాడులు, పరాయి పాలనల ప్రభావం ఉన్నప్పటికీ భారతీయ సంస్కృతి మూలాలు నిలిచిపోవడంలో ఈ వర్గాల పాత్ర ఉందన్నారు.

అయితే బ్రిటిష్ పాలకులు ఈ వర్గాలపై వివక్ష చూపి వారిని *‘పుట్టుకతోనే నేరస్తులు’*గా ముద్రవేసి సమాజానికి దూరం చేసే విధానాలను అమలు చేశారని విమర్శించారు. ఈ విధానాల ప్రభావంతో సంచార, విముక్త జాతులు సామాజికంగా, ఆర్థికంగా తీవ్రంగా వెనుకబడిపోయాయని తెలిపారు.

మోదీ ప్రభుత్వం ప్రత్యేక దృష్టి

ప్రధాని నరేంద్ర మోదీ నేతృత్వంలోని కేంద్ర ప్రభుత్వం గత పదేళ్లుగా సంచార, అర్ధ సంచార, విముక్త జాతుల సమస్యలను ప్రత్యేకంగా గుర్తించి పరిష్కారానికి చర్యలు చేపడుతోందని సత్యనారాయణ తెలిపారు. ఈ వర్గాల సామాజిక, ఆర్థిక స్థితిగతులపై అధ్యయనం చేసేందుకు కమిషన్లు, కమిటీలు ఏర్పాటు చేసి నివేదికలు రూపొందించిన విషయాన్ని ప్రస్తావించారు.

వారు ఎస్సీ, ఎస్టీ, బీసీ వర్గాల్లో ఏ కేటగిరీకి చెందుతారనే విషయంలో స్పష్టత లేకపోవడం వల్ల అనేక కుటుంబాలు ప్రభుత్వ సంక్షేమ పథకాల ప్రయోజనాలకు దూరమవుతున్నాయని అన్నారు.

స్థిర నివాసాలు.. వృత్తుల పరిరక్షణ

సంచార జీవన విధానానికి ముగింపు పలికి ఈ వర్గాలకు స్థిర నివాసాలు కల్పించడం, తరతరాలుగా కొనసాగిస్తున్న సంప్రదాయ వృత్తులను పరిరక్షించడం, వాటికి ఆర్థిక సహకారం అందించడం అవసరమని పాకా వెంకట సత్యనారాయణ అన్నారు.

వారి జీవనోపాధిని బలోపేతం చేసే విధంగా కేంద్ర, రాష్ట్ర ప్రభుత్వాలు ప్రత్యేక కార్యాచరణ రూపొందించాలని కోరారు. దేశవ్యాప్తంగా చేపట్టనున్న జనాభా మదింపు, కులాల వారీగా సమాచార సేకరణ నేపథ్యంలో సంచార, అర్ధ సంచార, విముక్త జాతుల సమస్యలను సమగ్రంగా గుర్తించి వారికి న్యాయం జరిగేలా చర్యలు తీసుకోవాల్సిన అవసరం ఉందన్నారు.

కేంద్రానికి నివేదిక అందజేస్తాం

బాధ్యత కలిగిన రాజకీయ పార్టీగా భారతీయ జనతా పార్టీ సంచార, అర్ధ సంచార, విముక్త జాతుల వాస్తవ పరిస్థితులను ప్రజల ముందుకు తీసుకురావడానికి కార్యక్రమాలు నిర్వహిస్తోందని తెలిపారు. ఆంధ్రప్రదేశ్‌లో నాలుగైదు ప్రాంతాల్లో సంచార, అర్ధ సంచార, విముక్త జాతుల దినోత్సవ కార్యక్రమాలు నిర్వహించినట్లు చెప్పారు.

విజయవాడలో జరిగిన కార్యక్రమంలో చర్చించిన అంశాలను క్రోడీకరించి కేంద్ర ప్రభుత్వానికి నివేదిక అందజేస్తామని వెల్లడించారు. వారి హక్కుల పరిరక్షణ, ఆర్థిక సాధికారత, సామాజిక న్యాయం కోసం నూతన విధానాల రూపకల్పన దిశగా కృషి చేస్తామని పాకా వెంకట సత్యనారాయణ తెలిపారు.

కార్యక్రమంలో పాల్గొన్న వారు

ఈ కార్యక్రమంలో బీజేపీ సంఘటనా ప్రధాన కార్యదర్శి మధుకర్ జీ, జిల్లా బీజేపీ అధ్యక్షుడు అడ్డూరి శ్రీరామ్, ఓబీసీ మోర్చా జిల్లా అధ్యక్షుడు సుబ్రహ్మణ్యం, బిజెపి రాష్ట్ర ఉపాధ్యక్షుడు బిట్ర శివనారాయణ, బీజేపీ రాష్ట్ర మీడియా ఇన్‌ఛార్జి కిలారి దిలీప్, బీజేపీ రాష్ట్ర కార్యాలయం ఇన్‌ఛార్జి ఉప్పలపాటి శ్రీనివాసరాజు, బలివాడ శివకుమార్ పట్నాయక్, చోరగండి శివలలిత, లాక వెంగళరావు యాదవ్, తుమ్మిలి రామకృష్ణ, హనుమంతురావు, రాకేష్ తదితరులు పాల్గొన్నారు.