డాక్టర్ వైఎస్ఆర్ 9 గంటల ఉచిత విద్యుత్ పథకం వ్యవసాయానికి లాభసాటి

-వ్యవసాయాన్ని లాభదాయకంగా మార్చడంతోపాటు రైతులకు సాధికారత కల్పించడమే ప్రభుత్వ లక్ష్యం
-వ్యవసాయానికి 9 గంటల ఉచిత విద్యుత్ పథకం రైతులకు భరోసా కల్పించింది
-ఉచిత విద్యుత్ పథకం వ్యవసాయ ఉత్పాదకతను పెంచడానికి, గ్రామీణ ఆర్థిక వ్యవస్థను పెంపొందించడానికి సహాయపడుతుంది
-సెకీ నుండి 7 వేల మెగావాట్ల విద్యుత్ను కొనుగోలు చేసేందుకు ఆంధ్రప్రదేశ్ నిర్ణయం తీసుకుంది
-రాబోయే 25 ఏళ్లపాటు రైతులకు నమ్మకమైన విద్యుత్ సరఫరా చేస్తామని రాష్ట్ర ప్రభుత్వం హామీ
-రైతులు సంతోషంగా ఉంటేనే రాష్ట్రం ప్రగతిపథంలో పయనిస్తుందని ముఖ్యమంత్రి బలంగా విశ్వసిస్తున్నారు
-ఇంధన శాఖ మంత్రి పెద్దిరెడ్డి రామచంద్రా రెడ్డి

విజయవాడ, నేటి పత్రిక ప్రజావార్త :
రాష్ర్టంలో వ్యవసాయ రంగానికి ఊతమిచ్చేలా రాష్ర్ట ప్రభుత్వం వరుసగా అనేక చర్యలు చేపడుతోంది. వ్యవసాయాన్ని లాభదాయకంగా మార్చడంతోపాటు రైతులకు సాధికారత కల్పించడమే లక్ష్యంగా రాబోయే 25 ఏళ్లపాటు రైతులకు ఉచిత విద్యుత్ అందించాలని లక్ష్యంగా పెట్టుకుని ముందకు సాగుతోంది. ఇందులో భాగంగా డాక్టర్ వైయస్సార్ 9 గంటల ఉచిత విద్యుత్ సరఫరా పథకాన్ని మరింత పటిష్టం చేసేందుకు చర్యలు చేపడుతోంది. తద్వారా సాగు భూములకు నీరందించడం ద్వారా శాశ్వతమైన, పటిష్టమైన వ్యవస్థను నిర్మించేందుకు బాటలు వేస్తోంది.
రైతుల పండగైనా సంక్రాంతి సందర్భంగా రాష్ట్రంలో ప్రత్యేకించి వ్యవసాయ రంగానికి సంబంధించి సాధారణ విద్యుత్ సరఫరా పై విద్యుత్ శాఖ అధికారులతో ఇంధన శాఖ మంత్రి పెద్దిరెడ్డి రామచంద్రారెడ్డి ఆదివారం టెలీకాన్ఫరెన్స్ నిర్వహించారు. ఈసందర్భంగా ఆయన మాట్లాడుతూ, వ్యవసాయానికి 9 గంటల ఉచిత విద్యుత్ పథకం రైతులకు భరోసా కల్పించిందన్నారు. పంటలను మరియు వ్యవసాయాన్ని అత్యంత విలువైనదిగా మార్చడానికి ఖచ్చితంగా ఇది సహాయం చేస్తుందని చెప్పారు. ఇది వ్యవసాయ ఉత్పాదకతను పెంపొందించడానికి, అన్ని ప్రాంతాలలో గ్రామీణ ఆర్థిక వ్యవస్థను పెంపొందించడానికి మరియు ఆంధ్రప్రదేశ్ యొక్క సంపూర్ణ అభివృద్ధికి సహాయపడుతుందని పేర్కొన్నారు.
సోలార్ ఎనర్జీ కార్పొరేషన్ ఆఫ్ ఇండియా (సెకీ) నుండి 7 వేల మెగావాట్ల విద్యుత్ను యూనిట్కు కేవలం రూ.2.49 వంతున ధరకు కొనుగోలు చేసేందుకు ఆంధ్రప్రదేశ్ నిర్ణయం తీసుకుందని తెలిపారు. రాబోయే 25 ఏళ్లపాటు రైతులకు నమ్మకమైన విద్యుత్ సరఫరా చేస్తామని రాష్ట్ర ప్రభుత్వం హామీ ఇచ్చిందన్నారు. సెకీ సెప్టెంబర్ 2024 నుండి మొదటి విడతలో 3 వేల మెగావాట్లు, రెండవ విడతలో 2025లో మరో 3 వేల మెగావాట్లు, మూడో విడతలో 2026 నుండి వెయ్యి మెగావాట్లు వంతున విద్యుత్ సరఫరా చేయడం ప్రారంభిస్తుందని వెల్లడించారు.
భవిష్యత్తులో రైతులను ఆదుకునేందుకు ప్రభుత్వం ఉచిత విద్యుత్ పథకాన్ని శాశ్వతంగా చేయాలనుకుంటున్నదని చెప్పారు. అలాగే ఆక్వా కల్చర్కు సబ్సిడీ ధరపై విద్యుత్ సరఫరా చేయడం ద్వారా వారికి ఆర్థికంగా మద్దతు కల్పించడంతోపాటు రైతు భరోసా వంటి కార్యక్రమాలను కూడా అమలు చేస్తోందన్నారు. ఈ కార్యక్రమాలు గ్రామీణ ప్రాంతాల్లోని రైతుల జీవితాలలో గొప్ప మార్పును తీసుకువస్తాయన్నారు. రైతులు సంతోషంగా ఉంటేనే రాష్ట్రం ప్రగతిపథంలో పయనిస్తుందని ముఖ్యమంత్రి వైఎస్ జగన్మోహన్ రెడ్డి బలంగా విశ్వసిస్తున్నారని చెప్పిన మంత్రి ఆదిశగా రైతులకు ప్రయోజనం చేకూర్చే అనేక కార్యక్రమాలను చేపట్టడం జరుగుతోందన్నారు.
డిస్కమ్ల పనితీరును మెరుగుపరచడానికి , వ్యవసాయ రంగానికి నాణ్యమైన విద్యుత్ సరఫరా చేయడానికి రాష్ట్ర ప్రభుత్వం డైరెక్ట్ బెనిఫిట్ ట్రాన్స్ఫర్ (డిబిటి) పథకాన్ని అమలు చేస్తోందని ఇంధన శాఖ స్పెషల్ చీఫ్ సెక్రటరీ కె విజయానంద్ తెలిపారు. ప్రస్తుతానికి, డిస్కమ్లు వ్యవసాయానికి సంవత్సరానికి 12 వేల మిలియన్ యూనిట్లను సరఫరా చేస్తున్నాయని, దీని కోసం ప్రభుత్వం సంవత్సరానికి రూ. 8,400 కోట్ల రూపాయల సబ్సిడీని భరిస్తోందని వివరించారు.
ఎనర్జీ మీటర్ల సరఫరా మరియు ఇన్స్టాలేషన్ కోసం డీబీటీ పథకం అమలు చేయడం పైలట్ ప్రాజెక్ట్గా తూర్పుప్రాంత విద్యుత్ సంస్థ (ఈపీడీసీఎల్)లోని శ్రీకాకుళం జిల్లాలో 28,684 వ్యవసాయ కనెక్షన్లకు మీటర్లను అమర్చడం జరిగిందన్నారు. ప్రస్తుతం రాష్ట్ర ప్రభుత్వం.. వ్యవసాయ వినియోగానికి సంబంధించిన నెలవారీ బిల్లింగ్ మొత్తాన్ని రీయింబర్స్ చేస్తోందని తెలిపారు. చెల్లింపులు సకాలంలో అందకపోయినా డిస్కమ్లు రైతులకు ఉచిత విద్యుత్ సరఫరాను కొనసాగిస్తాయని పేర్కొన్నారు. డీబీటీ కింద ఉన్న మొత్తం 16,67,389 వ్యవసాయ కనెక్షన్లలో 16,38,650 వ్యవసాయ కనెక్షన్ల కోసం వివిధ బ్యాంకుల్లో బ్యాంకు ఖాతాలు తెరవడం జరిగిందని వివరించారు.
6,770 ఫీడర్లలో 6652 ఫీడర్లు ఇప్పటికే ఉన్న మౌలిక సదుపాయాలతో 9 గంటల వ్యవసాయ విద్యుత్ సరఫరా చేయగలవని విద్యుత్ శాఖ అధికారులు ఇంధన మంత్రికి వివరించారు, మిగిలిన 118 ఫీడర్లకు పగటిపూట 9 గంటలు సరఫరా చేయడానికి అవసరమైన మౌలిక సదుపాయాలను పెంచాల్సి ఉందని తెలిపారు.
ఈ టెలీకాన్ఫరెన్స్లో ఏపీజెన్కో ఎండీ బీ శ్రీధర్, ట్రాన్స్కో జేఎండీ ఐ పృథ్వీ తేజ్, డిస్కమ్ సీఎండీలు జే పద్మ జనార్దనరెడ్డి, కే సంతోషరావు, ఇతర ఉన్నతాధికారులు పాల్గొన్నారు.