గ‌త‌ ప్ర‌భుత్వం ప్రచారార్భాటమే త‌ప్ప‌…… నాడు-నేడు ప‌నుల్లో అంతా డొల్లే

-శాసన మండ‌లి ప్ర‌శ్నోత్త‌రాల్లో నిగ్గుతేల్చిన వైద్య, ఆరోగ్యశాఖ మంత్రి సత్యకుమార్ యాదవ్

అమరావతి, నేటి పత్రిక ప్రజావార్త :
గ‌త ప్ర‌భుత్వం నాడు-నేడు కింద వైద్య, ఆరోగ్య రంగంలో చేప‌ట్టిన ప‌నుల్లో అంతా డొల్ల‌త‌న‌మే క‌నిపిస్తోంద‌ని రాష్ట్ర వైద్య, ఆరోగ్యశాఖ మంత్రి  సత్యకుమార్ యాదవ్ వ్యాఖ్యానించారు. అధికారంలో ఉన్న‌ప్పుడు రాష్ట్ర వైద్య, ఆరోగ్య రంగం రూపురేఖలు సమూలంగా మార్చినట్లు చెప్పుకుంటున్న ఆ మహానుభావుడు (మాజీ ముఖ్యమంత్రి) ఈ విషయంలో ప్రచారార్భటమే త‌ప్ప వాస్త‌వ ప‌రిస్థితులు అందుకు విరుద్ధంగా ఉన్నాయ‌న్నారు. నాడు- నేడు ప‌థ‌కం కింద ప్ర‌భుత్వాసుప‌త్రుల్ని ఆధునీక‌రించేందుకు ప్ర‌భుత్వం తీసుకున్న చ‌ర్య‌లేంట‌ని గురువారంనాడు శాస‌న మండ‌లిలో స‌భ్యుల‌డిగిన ప్ర‌శ్న‌ల‌కు మంత్రి స‌మాధానం చెప్పారు. గత ప్రభుత్వ పాలకులు గొప్పగా చెప్పుకుంటున్న నాడు-నేడు ప‌నుల‌కు సంబంధించి మంత్రి శాస‌న మండ‌లిలో నిగ్గు తేల్చారు.

గత ముఖ్యమంత్రి అధికారంలో ఉన్నప్పుడు మరియు అధికారంలో లేనప్పుడు కూడా రాష్ట్రంలో వైద్య, ఆరోగ్య రంగం ముఖచిత్రాన్ని మార్చానని గొప్ప‌లు చెప్పుకుంటున్నార‌ని, అయితే వాస్త‌వానికి చేప‌ట్టిన ప‌నుల‌ను ప‌నిశీలిస్తే ఏమేర‌కు నిజానిజాలు తెలిశాయ‌ని మంత్రి చెప్పారు. విస్తృతంగా ప్రచారం చేయబడిన ‘నాడు-నాడు’ కార్యక్రమానికి మొత్తం రూ.14,146 కోట్ల‌కు సంబంధించి రూ.8,480 కోట్లతో 17 కొత్త ప్రభుత్వ వైద్య కళాశాలలను ఏర్పాటు చేయాల్సి ఉందన్నారు. ఇందులో అనుసంధానంగా ఉన్న బోధనా ఆసుపత్రులను అప్‌గ్రేడ్ చేయడం కూడా ఉందన్నారు. పాత 11 ప్రభుత్వ వైద్య కళాశాలల్లో మౌలిక సదుపాయాలను మెరుగుపరచడం ద్వారా రూ.3,820 కోట్ల వ్యయంతో 756 పీజీ అడ్మిషన్లను ప్రారంభించాల్సి ఉందన్నారు. కమ్యూనిటీ హెల్త్ సెంటర్లు మరియు ఏరియా ఆసుపత్రులను రూ.1,225 కోట్లతో మరింత మెరుగుపరచాల్సి ఉంద‌న్నారు. గిరిజన ప్రాంతాల్లో 5 మల్టీ-స్పెషాలిటీ ఆసుపత్రులను రూ.246 కోట్లతో అభివృద్ధి చేయాలని, కడపలోని క్యాన్సర్ హాస్పిటల్, ఇన్స్టిట్యూట్ ఆఫ్ మెంటల్ హెల్త్ మరియు సూపర్ స్పెషాలిటీ హాస్పిటల్‌తో పాటు పలాసలోని కిడ్నీ రీసెర్చ్ సెంటర్‌కు రూ.335.27 కోట్లు ఖర్చు చేయాల్సి ఉంద‌న్నారు. నాడు-నేడు కింద ఖర్చు చేయాల్సిన ఈ మొత్తం ప్రణాళికా వ్యయం రూ.14,146 కోట్లలో… ఎక్కువ నిధులు నాబార్డ్ మరియు కేంద్ర‌ ప్రభుత్వం నుండి మొత్తం రూ.10,738 కోట్లు మేర నిధులందాయ‌న్నారు. ఇది నాడు-నేడు కార్యక్రమం యొక్క మొత్తం ఆమోదించబడిన ఖర్చులో 76% కాగా, రాష్ట్ర ప్రభుత్వ వాటా రూ.3,408.58 కోట్లు మాత్రమే అని, ఇది మొత్తం ఖర్చులో 24% మాత్రమే అని మంత్రి తెలిపారు. నాడు-నేడు మొత్తం ఖర్చు రూ.14,146 కోట్లలో….2019-24లో వాస్తవ వ్యయం రూ.2,445 కోట్లు మాత్రమేన‌ని, ఇది మొత్తం ఖర్చులో 17% మాత్రమేన‌ని, నాడు-నేడు కింద రాష్ట్ర ప్రభుత్వ వాటా రూ.3,408.58 కోట్లలో గత ప్రభుత్వం రూ.963 కోట్లు మాత్రమే ఖర్చు చేసిందని, ఇది 28% కాగా… నాడు-నేడు మొత్తం ఖర్చులో ఇది 7% కంటే తక్కువ అని తెలిపారు. అధికారంలో ఉన్నప్పుడు నామ మాత్రపు ఖర్చు నాడు-నేడు కింద చేసిన ఖర్చుకు పూర్తిగా విరుద్ధంగా ఉన్నప్పటికీ, గత ముఖ్యమంత్రి మాత్రం తాను రాష్ట్రంలో వైద్య, ఆరోగ్య రంగం ముఖచిత్రాన్ని సమూలంగా మార్చానని ఇప్పటికీ గొప్పలు చెప్పుకోవ‌డం హాస్యాస్పదంగా ఉంద‌న్నారు.

17 కొత్త ప్రభుత్వ వైద్య కళాశాలల కోసం చేసిన మొత్తం ఖర్చు రూ.8,480 కోట్లు కాగా, గత ప్రభుత్వం చేసిన వాస్తవ ఖర్చు కేవలం 14% మాత్రమేన‌న్నారు. ఆయన అనుసరించిన ఈ వైఖరి వ‌ల్ల రాష్ట్రాన్ని మొత్తం ఆర్థిక ఇబ్బందుల్లోకి నెట్టిందన్నారు. గిరిజన ప్రాంతాల్లో 5 మల్టీ-స్పెషాలిటీ ఆసుపత్రుల ఏర్పాటు విషయంలో పరిస్థితి మరింత దారుణంగా ఉందన్నారు. ఈ విషయంలో రూ.246 కోట్ల హామీకి వ్యతిరేకంగా, గత ప్రభుత్వం అధికారంలో ఉన్నప్పుడు రూ.24.43 కోట్లు మాత్రమే ఖర్చు చేసిందని, ఇది 10% కంటే తక్కువ అని, గిరిజన ప్రజల సంక్షేమం పట్ల గత ప్రభుత్వానికెంత చిత్త‌శుద్ది ఉందో దీనిబ‌ట్టి తెలుస్తోంద‌న్నారు.

అదే విధంగా కడపలోని క్యాన్సర్ హాస్పిటల్, ఇన్స్టిట్యూట్ ఆఫ్ మెంటల్ హెల్త్ మరియు మల్టీ-స్పెషాలిటీ హాస్పిటల్‌తో పాటు పలాసలోని కిడ్నీ రీసెర్చ్ సెంటర్‌కు సంబంధించిన రాష్ట్ర నిధులతో మాత్రమే పనులు చేపట్టాల్సి ఉంద‌న్నారు. ఈ 4 ప్రాజెక్టులకు ఖర్చు చేయాల్సిన రాష్ట్ర నిధులు రూ.335.27 కోట్లు అని, ఇది నాడు-నేడు కార్యక్రమం యొక్క ఆమోదించబడిన మొత్తం ఖర్చులో 2.37% మాత్రమే అని మంత్రి తెలిపారు.
నాడు -నేడు కింద 14 వేల 106 కోట్ల రూపాయలు ఖర్చు పెట్టాల్సి ఉండగా గత వైసీపీ ప్రభుత్వం కేవలం రూ.2,445 కోట్లు మాత్రమే ఖ‌ర్చు పెట్టింద‌న్నారు. మొత్తం నిధుల్లో రూ.10 వేల కోట్లకు పైగా నాబార్డు, గ్రాంట్స్, సాస్కి తదితర పథకాల ద్వారా కేంద్రం నుంచి వస్తుందన్నారు. గ‌త ప్ర‌భుత్వం రూ.3,400 కోట్లు ఖర్చు చేయాల్సి ఉండ‌గా, కేవలం రూ. 963 కోట్లు మాత్రమే ఖర్చు చేసింద‌నీ, ప్రజారోగ్య పరిరక్షణలో గత ప్రభుత్వానికి చిత్తశుద్ధి లేదు అనడానికి ఇంత‌కంటే నిద‌ర్శ‌న‌మేముంద‌న్నారు. నందిగామలో కమ్యూనిటీ హెల్త్ సెంటర్​ను వంద పడకల ఏరియా ఆస్పత్రిగా అప్​గ్రేడ్​ చేస్తామ‌న్నారు. వైద్య, ఆరోగ్య రంగం అభివృద్ధి కోసం విడుదల చేసిన నిధులను దారి మళ్లించడం దారుణ‌మ‌న్నారు.

జూన్, 2024 నుండి కూట‌మి ప్రభుత్వం నాడు -నేడు ప‌నుల‌కు రూ. 1.659 కోట్లు కేటాయించింద‌న్నారు. పలాసలో నిర్మితమవుతున్న కిడ్నీ పరిశోధనా కేంద్రం, డయాలసిస్ యూనిట్ తో కూడిన సూపర్ స్పెషాలిటీ ఆస్పత్రికి డిఎంఇ రాష్ట్ర బడ్జెట్ ద్వారా రు.78.27 కోట్లు, కడపలో నిర్మితమవుతున్న క్యాన్సర్ ఆస్పత్రి, మానసిక ఆరోగ్య సంస్థ, సూపర్ స్పెషాలిటీ ఆస్పత్రులకు డిఎంఇ రాష్ట్ర బడ్జెట్ ద్వారా రు.257 కోట్లు, వెరసి మొత్తం రు.14,106 కోట్లను బడ్జెట్ లో కేటాయించింద‌న్నారు.

రాష్ట్రంలో ప్రభుత్వ ఆస్పత్రుల ఆధునికీకరణ ప్రక్రియను కొనసాగిస్తున్నామన్నారు. నాడు -నేడు కింద ఆస్పత్రుల నిర్మాణం విషయంలో గత ప్రభుత్వం నిర్లక్ష్యంగా వ్యవహరించిందన్నారు. వైద్య ఆరోగ్యశాఖకు మొత్తం 14 వేల106 కోట్లు ఖర్చు పెట్టాల్సి ఉండగా గత ప్రభుత్వం కేవలం రూ. 2445 కోట్లు మాత్రమే ఖర్చు పెట్టిందని వివరించారు. అదే విధంగా గిరిజన ప్రాంతాల్లో 5 మల్టీ స్పెషాలిటీ ఆస్పత్రుల‌కు రూ.246 కోట్లు ఖర్చు పెట్టాల్సి ఉండగా రూ. 24 కోట్లు మాత్రమే ఖర్చు పెట్టారని తెలిపారు. సూపర్ స్పెషాలిటీ ఆస్పత్రుల నిర్మాణంలో గత ప్రభుత్వానికి చిత్తశుద్ది లోపించిందంటూ ఆస్పత్రుల నిర్మాణం కోసం రూ.14,106 కోట్లలో నాబార్డు , కేంద్రం ద్వారా సాయం అందే అవకాశం ఉన్నా దానిని సమర్ధవంతంగా వినియోగించలేకపోయారని తెలిపారు. ఆస్పత్రుల నిర్మాణం కోసం రాష్ట్రం రూ.3400 కోట్లు ఖర్చు పెట్టాల్సి ఉండగా ఐదే ళ్లలో కేవలం రూ.963 కోట్లు మాత్రమే ఖర్చు పెట్టారన్నారు. కూటమి ప్రభుత్వం అధికారంలోకొచ్చే నాటికి సూపర్ స్పషాలిటీ ఆస్పత్రుల్లో 59శాతం ఖాళీలు ఉండగా..భర్తీ ప్రక్రియ చేపట్టామ‌న్నారు. రాష్ట్రంలో ఆస్పత్రుల ఆధునికీకరణ కు అత్యంత ప్రాధాన్యతగా తీసుకుని నిర్మిస్తున్నామ‌న్నారు. ప్రధాన మంత్రి ఆయుష్మాన్ భారత్ ఇన్ఫ్రాస్ట్రక్చర్ మిషన్ కింద రాష్ట్రంలో మరో 3,500 ఆయుష్మాన్ ఆరోగ్య మందిర్ లు నిర్మిస్తామ‌న్నారు. ప్రతి నియోజక వర్గంలో 100 పడకల ఆస్పత్రులను పీపీపీ మోడ్ లో నిర్మిస్తామ‌న్నారు. నందిగామ ఏరియా ఆస్పత్రి స్థానంలోనే వంద పడకల ఆస్పత్రి నిర్మిస్తామ‌ని, నందిగామలో మెడికల్ కళాశాల ఏర్పాటు చేయడం సాధ్యంకాదని మంత్రి స్ప‌ష్టం చేశారు.

గ్రామాల్లో నిరంత‌ర‌మూ వైద్య సేవ‌లందించాల‌న్న ఉద్దేశంతో క‌మ్యూనిటీ హెల్త్ ఆఫీస‌ర్ ల‌ను నియ‌మించామ‌ని, వీరికి నెల‌కు రూ.25 వేలు చొప్పున జీత‌మిస్తున్నామ‌ని చెప్పారు. గ్రామాల్లోనే నివ‌సించి సేవ‌లందిస్తే అద‌నంగా మ‌రో రూ.10 వేలు ఇన్సెంటివ్ ఇస్తామ‌న్నారు.